Të plagosur dhe dëme nga sulmet ruse në Ukrainë

Sulmet ruse mëngjesin e së enjtes kanë shkaktuar zjarre dhe dëme të mëdha në pesë qarqe të Kievit, njoftoi kryetari i kryeqytetit ukrainas, Vitali Klitschko, në Telegram.

Copëzat e dronëve të rrëzuar ranë në qarqet Peçersk, Holosivski, Solomiansk, Obolonsk dhe Podilsk, tha Klitschko.

Ai shtoi se dy njerëz u lënduan pasi u goditën nga copëzat e dronëve të rrëzuar.

Klitschko raportoi se katet e sipërme të një ndërtesë shumëkatëshe në Peçersk u përfshinë nga zjarri dhe se banorët u evakuuan.

Në Odesa, një ndërtesë e lartë banimi u dëmtua dhe një burrë u plagos, pasi mbrojtja ajrore e Ukrainës rrëzoi dronë rusë mbi portin e Detit të Zi, tha guvernatori rajonal, Oleh Kiper.

Kanalet në Telegram e publikuan një video që shfaq një zjarr në katin e parë të një ndërtesë nëntëkatëshe në Odesa.

Lufta në Ukrainë ka nisur më 24 shkurt të vitit 2022.

Presidenti rus, Vladimir Putin, e quan luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL