Prokuroria Speciale ngre aktakuzë ndaj një personi për krime lufte ndaj civilëve në Komunën e Malishevës

Prokuroria Speciale e Kosovës ka njoftuar se ka ngritur aktakuzë ndaj një personi, i cili dyshohet për krime lufte ndaj popullsisë civile.

Siç ka njoftuar Prokuroria, në aktakuzë thuhet se veprimet penale janë kryer gjatë periudhës 1998-1999 në fshatin Panorc të Komunës së Malishevës.

Personi në fjalë aktualisht është në paraburgim, ndërsa kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë.

“Prokuroria Speciale e Republikës së Kosovës, ka ngritur sot aktakuzë në Gjykatën Themelore në Prishtinë – Departamentin Special, kundër të pandehurit S.L., për shkak të dyshimit të bazuar mirë se në bashkëkryerje ka kryer veprën penale “Krim i luftës kundër popullsisë civile”, e sanksionuar me nenin 142 lidhur me nenin 22 të Ligjit Penal të RSFJ-së.

Sipas aktakuzës, veprimet penale janë kryer gjatë periudhës 1998-1999 në fshatin Panorc, Komuna Malishevë. I pandehuri, duke vepruar në bashkëkryerje me pjesëtar të tjerë të forcave policore dhe ushtarake serbe, ka shkelur rregullat e së drejtës ndërkombëtare, duke kryer arrestime të kundërligjshme, tortura fizike dhe psikologjike të rreth 500 qytetarëve që nuk ishin të përfshirë në luftë, dëbime masive të popullatës shqiptare, shkatërrim të pronave dhe plaçkitje.

I pandehuri gjendet nën masën e paraburgimit deri në një vendim tjetër të gjykatës. Kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë”, shkruhet në njoftimin e Prokurorisë.