Luan në Champions dhe është gati ta aktivizojë titullar Asllanin, klubi italian e kërkon në huazim

Kristjan Asllani nuk do të mund të luajë titullar fiks te Interi për sa kohë në radhët e këtij klubi gjendet Hakan Çalhanollu dhe kjo duket se po shtyn shumë skuadra të tjera të tentojnë afrimin e mesfushorit shqiptar.

Një prej tyre, raportohet se është Bolonja, e cila kërkon përforcime për pjesën e dytë të sezonit ku do të tentojë t’i afrohet përsëri zonës së Ligës së Kampioneve, në të cilën po luan në këtë edicion.

Gazeta e qytetit të Bolonjës, ”il Resto Del Carlino”, ka bërë të ditur se klubi ka piketuar Asllanin si një prej përforcimeve për pjesën e dytë të sezonit. Kuptohet, që lojtarit i ofrohet mundësia që të luajë titullar në radhët e kësaj skuadre.

Por edhe te Bolonja janë të ndërgjegjshëm se do të jetë e vështirë të shkëputet mesfushori shqiptar nga klubi ku ai mbetet një alternativë e rëndësishme për trajnerin Inzagi në luftën drejt mbrojtjes së titullit dhe një ecurie të suksesshme në Ligën e Kampioneve.