Lamine Yamal si Messi?

David Villa, një nga sulmuesit më të mirë spanjollë të të gjitha kohërave, i njohur si “El Guaje”, ka pasur një karrierë të lavdishme me Barcelonën dhe Atletico Madridin. Në një intervistë për gazetën “AS”, ai shprehu mendimin personal mbi situatën e Barcelonës dhe luftën për titull në La Liga, ku Atletico Madridi i Simeones ka hyrë fuqishëm në garë.

Mbi situatën aktuale të Barcelonës: “Tani nuk po kalon një moment të mirë, por kjo është normale. Barça është Barça. Është një klub ku të jesh i dyti nuk mjafton, gjithçka varet nga fitorja. I njoh mirë pritshmëritë e tifozëve blaugrana dhe besoj se ata janë të kënaqur që ekipi po fokusohet te lojtarët e akademisë, po luan futboll të shkëlqyer dhe po lufton në majat e klasifikimit.

Barcelona do të luftojë për gjithçka, sepse ka lojtarë të nivelit botëror. Është e pamundur të mendosh për ndonjë kompeticion dhe të mos e konsiderosh Barcelonën si një prej pretendentëve kryesorë për titull”.

Për Lamine Yamal: “Është një djalë i jashtëzakonshëm. Më lë pa fjalë si luan, si e kupton futbollin… Nuk e njoh personalisht, por e kam takuar disa herë dhe duket shumë i qetë, i përqendruar. Nuk është thjesht një shpërthim i përkohshëm i një lojtari që zgjat disa muaj.

Prej kohësh po tregon vlerën e tij dhe vazhdon të rritet. Është vërtet i talentuar dhe çdo herë që e shikoj duke luajtur, vërej përmirësime. Për më tepër, ai e di çfarë do të thotë të jesh kampion”.

A do ta krahasonte me Messin: “Kurrë. Mendoj se sot është shumë e vështirë të krahasosh ndonjë lojtar me Messin. Lamine Yamal është tashmë një yll botëror. Ai ka arritur gjëra të rëndësishme në vetëm dy vite dhe, si tifoz i Barcelonës, jam shumë i emocionuar për të.

Edhe tifozët kanë të drejtë të ëndërrojnë me të, por nuk mendoj se është e nevojshme ta krahasojmë me Messin, sepse ai do të ketë një karrierë të shkëlqyer në mënyrën e tij unike”.