Valbona, fitore tenistike kundër Turbinës

Valbona e Turbina, që stërviten së bashku në kompleksin “Football Republic”, seancën e së mërkurës e zhvilluan në formë testi, kur u përballën në një miqësore.

Të dy skuadrat kishin marrë shumë lojtarë në provë, ku Valbona dhe Turbina aktivizuan gjatë lojës nga 20 lojtarë.

Ende nuk janë konfirmuar lëvizjet e kësaj merktoje te tropojanët, ku vetëm një konsiderohet i larguar zyrtarisht dhe ai është Kevi Berberi, i cili rikthehet në vendlindje, në Pogradec. Edhe pse kanë shumë javë që nuk janë pjesë e Valbonës, Kovaçi e Krasniqi ende nuk figurojnë të larguar, kështu që mund të rikthehen në ekip. Ata nuk u paraqitën as në testin e djeshëm.

Ndeshja miqësore nis me aktivizimin e lojtarëve të afruar në provë. Në 35 minutat e para skuadrat shënojnë 5 gola. Fillimisht janë cërrikasit që realizojnë me Alijaj në të 6-tën. Pas dy minutash barazon Xhabafti për tropojanët.

Në të 15-ën, Turbina kalon sërish në epërsi me anë të Vrenozit, por Valbona në 4 minuta përmbys shifrat. Në të 31-ën, Petraçaj barazon 2-2 dhe në të 35-ën Kamilo, me një supergol nga 40 metra, kalon në epërsi Valbonën 3-2. Në pjesën e dytë, skuadra tropojane zotëron lojën dhe shënon tre gola. Fillimisht Vidrica në të 72-ën e 3 minuta më pas, Uesli thellon në 5-2. Në minutën e fundit Balla vulos rezultatin tenistik, 6-2. Kjo ndeshje i vlejti së tepërmi skuadrës së Valbonës, që të shtunën do të ndeshet në Fier për kampionat, kundër Apolonisë. Ndërsa Turbina do të vijojë sërish me miqësore të tjera deri në fillimin e kampionatit të Kategorisë së Dytë.

VALBONA – TURBINA 6-2

Golat: Xhabafti 8′, Petraçaj 31′, Kamilo 35′, Vidrica 72′, Uesli 73’, Balla 90′ / Alijaj 6′, Vrenozi 15′

VALBONA: Hoxha, Lala, Doçi, Laval, Xhabafti, Sadiç, Kamilo, Haland, Magdi, Pjetraçaj, Benjamin. Trajner: Emiliano Gega

Turbina: Toromani, Alimerkaj, Lami, Ageja, Isak, Aga, Rreli, Denis, Vrenozi, Aleksi, Alijaj. Trajner: Xhunejt Çutra.