Zelensky: Evropa duhet ‘të bëjë shumë më tepër’ për të arritur paqen

Presidenti ukrainas Volodymyr Zelensky tha të premten pas një morie telefonatash me liderët e vendeve aleate se Evropa duhet të bëjë “shumë më shumë” për të sjellë paqen.

Pasi foli me liderët e vendeve duke përfshirë Gjermaninë dhe Poloninë të premten, Zelensky tha në fjalimin e tij televiziv në mbrëmje se “Evropa duhet dhe mund të bëjë shumë më tepër për të siguruar që paqja të arrihet realisht” në Ukrainë.

Zelensky shtoi se “është e mundur” të arrihet fundi i luftës me Rusinë pasi Ukraina dhe partnerët e saj në Evropë kanë “propozime të qarta”.

“Mbi këtë bazë ne mund të sigurojmë zbatimin e një strategjie evropiane dhe është e rëndësishme që kjo të bëhet së bashku me Amerikën”, tha ai.

Shtetet e Bashkuara po i bëjnë presion ekipit të Zelensky që të nënshkruajë një marrëveshje duke i dhënë asaj akses në depozitat minerale të Ukrainës dhe Zelensky tha se shpresonte për një “rezultat të drejtë”.

“Kjo është një marrëveshje që mund t’i shtojë vlerë marrëdhënies sonë dhe gjëja kryesore është të përpunojmë detajet në mënyrë që të funksionojë,” tha ai pasi u përball me një sërë sulmesh nga Presidenti i SHBA Donald Trump mbi refuzimin e Ukrainës për të nënshkruar menjëherë marrëveshjen.

Në një përpjekje për të mbledhur aleatët e tij, Zelensky foli të premten me liderët evropianë nga Gjermania, Suedia, Republika Çeke, Polonia, Luksemburgu, Sllovenia dhe Kroacia, si dhe presidenti i Bregut të Fildishtë.

Ndihmësi i tij Andriy Yermak foli gjithashtu me një homolog brazilian.