Putini nuk po tregon asnjë shenjë kompromisi

Vladimir Putini nuk pritej ta refuzonte kategorikisht propozimin e SHBA-së për një armëpushim, por gjithashtu nuk pritej ta mbështeste plotësisht atë. Marrëveshja e Rusisë, siç pritej, vjen me disa kushte bashkëngjitur.

Lideri i Kremlinit nuk specifikoi kërkesat e Moskës, por ai aludoi për to duke thënë se çdo marrëveshje paqeje duhet të eliminojë “shkaqet rrënjësore” të konfliktit.

Ky është bërë një refren i zakonshëm i tij dhe tregon se pozicioni maksimalist i Moskës nuk ka ndryshuar. Me “shkaqe rrënjësore”, presidenti rus i referohet zgjerimit të NATO-s drejt lindjes, të cilin ai e fajëson si shkakun kryesor të luftës në Ukrainë.

Ky është një tregues shumë i qartë se pranimi i tij për një armëpushim varet nga sigurimi i disa garancive për veten e tij, për shembull një premtim që Ukraina kurrë nuk do të anëtarësohet në NATO ose që në të ardhmen nuk do të ketë forca paqeruajtëse evropiane nga vendet anëtare të NATO-s, të vendosura në vend.

Ai gjithashtu shpjegoi pse Moska ngurron të pranojë një armëpushim të menjëhershëm, duke folur gjatë për përparimet e forcave të tij në rajonin e Kurskut.

Inkursioni i Ukrainës atje ka qenë poshtërues për Kremlinin, por dëbimi i tyre është më në fund brenda mundësive. Vladimir Putini nuk dëshiron ta humbasë këtë mundësi. Duke ndalur ofensivën e Rusisë, ai ka frikë se do të humbasin avantazhin dhe do t’i japin armikut kohë për t’u rigrupuar.

Megjithatë, Vladimir Putini u tregua i kujdesshëm për të falënderuar Donald Trumpin për përpjekjet e tij për të arritur një marrëveshje paqeje, ndoshta duke qenë i vetëdijshëm për ndonjë reagim të mundshëm nga Shtëpia e Bardhë. Por, pavarësisht kësaj, ai ende nuk duket se po tregon ndonjë shenjë kompromisi.

Pra, në shumë drejtime, duket sikur asgjë nuk ka ndryshuar. / bota.al