Bilbao e përmbysë Romën, eliminohet edhe Ajaxi

Sonte janë përcaktuar katër skuadrat e para çerekfinaliste të Ligës së Evropës.

Athletic Bilbao e ka përmbysur Romën në ndeshjen e kthimit të së tetës së finales.

“Giallorossi” e kishin fituar lojën e parë 2:1 në shtëpi, ndërsa sonte fituan spanjollët me rezultat 3:1 për ta prekur çerekfinalen.

Nico Williams i shënoi dy gola, ndërsa një tjetër e shtoi Berchiche.

Kurse, goli i Paredes në minutat shtesë nga penalltia ishte i pamjaftueshëm për italianët.

Ndërkohë, nga Liga e Evropës u eliminua edhe Ajaxi, i cili pësoi humbje 1:4 nga Eintracht Frankfurti.

Ky i fundit fitoi me rezultat të përgjithshëm 6:2 dhe e preu një biletë në mesin e tetë më të mirëve të kësaj gare.

Përpara shkoi edhe Lazio, të cilës i mjaftoi barazimi 1:1 ndaj Viktoria Plzen në shtëpi për ta siguruar kualifikimin me rezultat të përgjithshëm, 3:2.

Kurse, fitorja 2:1 sonte në shtëpi nuk i mjaftoi Olympiakosit pasi kualifikimin e siguroi Bodoe/Glimt me rezultat të përgjithshëm, 4:2.