Tudor kërkon ndryshime taktike për të ringritur Juventus

Trajneri i ri i Juventusit, Igor Tudor, ka theksuar nevojën urgjente për ndryshime taktike për të rigjallëruar performancën e skuadrës, duke nisur nga ndeshja e së shtunës kundër Genoa.

Ish-qendërmbrojtësi i Kroacisë është emëruar trajner i Juventus pas shkarkimit të Thiago Motta, pas dy humbjeve të rënda radhazi që e kanë lënë klubin nga Torino në vendin e pestë në Serie A, vetëm një pikë larg katër skuadra më lart. 

Dyzet e gjashtë vjeçari e di se është nën presion për ta ndryshuar situatën dhe është i gatshëm të fillojë me një fitore ndaj Genoa.

Ai ka theksuar se skuadra është në një periudhë ndryshimi, duke sjellë shumë lojtarë të rinj, por kjo mund të ketë ngadalësuar përparimin e skuadrës.

"Kemi filluar një rrugë ndryshimi me shumë lojtarë të rinj, dhe kjo mund të ketë ngadalësuar rritjen e skuadrës. Por kur je te Juve, duhet të fitosh dhe të rritesh shpejt", ka thënë ai në konferencën për shtyp.

Tudor ka shprehur nevojën për punë intensive për të krijuar një skuadër me ekuilibër, duke kërkuar që të ruhet një stil sulmues, por me fokus në mbrojtje.

"Ne nuk duhet të heqim dorë nga asgjë. Dua që njerëzit të argëtohen.

Gjithmonë dua të shënoj një gol më shumë. Më pëlqen të sulmoj me shumë lojtarë, por nuk dua të pranojmë gola", ka shtuar ai.

Për të realizuar vizionin e tij për Juventus, Tudor ka theksuar se do të duhet kohë për të implementuar ndryshimet taktike.

"Nuk mund ta krahasoj Juventusin tim me të tjerët. Po bëj punën time. Të shtunën, shpresoj të tregoj shpirtin që nuk duhet të mungojë kurrë. Nga një këndvështrim taktik, do të duhen dy deri në tri javë", është shprehur ai.

Tudor ka konfirmuar se Manuel Locatelli do të mbetet kapiteni i skuadrës, duke theksuar se ai ka cilësitë e duhura për të udhëhequr ekipin në këtë periudhë ndryshimesh.