Asllani i pezulluar, Inter synon finalen e Kupës së Italisë

Kupa e Italisë nuk është thjesht një trofe dytësor, as për Interin dhe as për Simone Inzaghin, i cili, duke përfshirë edhe kohën e tij te Lazio, e ka fituar tashmë tri herë këtë kompeticion.

Nga ana tjetër, Interi ka triumfuar në këtë turne nëntë herë dhe është vetëm një hap larg një "ylli të argjendtë", siç e quan ‘Gazzetta dello Sport’.

Gazeta thekson se nëse Interi fiton Kupën e dhjetë të Italisë, mund të kërkojë nga Federata vendosjen e një ylli të ri mbi fanellë.

Nuk ka një rregullore specifike për këtë, por kërkesa do të merrej në konsideratë, edhe pse Juventusi, që ka fituar Kupën 15 herë, nuk ka zgjedhur ta bëjë këtë.

Derbi me Milanin, një duel për një sezon të tërë

Milan është pengesa e fundit e Interit për të arritur në finalen e Kupës. Për kuqezinjtë, ky derbi mund të vendosë gjithë sezonin e tyre, ndërsa për Interin vjen në një periudhë të ngarkuar, me ndeshje vendimtare në kampionat dhe Champions League.

Këto përplasje të njëpasnjëshme, të shoqëruara me mungesa për shkak të dëmtimeve dhe pezullimeve, e bëjnë menaxhimin e skuadrës një sfidë të ndërlikuar për Inzaghin.

Situata e skuadrës dhe formacioni i mundshëm

Në aspektin e mungesave, janë të konfirmuara dëmtimet e Dumfries, Taremi dhe Zielinski, si dhe pezullimi i Asllanit. Dyshime ka ende për De Vrij dhe në një farë mase për Lautaro Martinez-in.

Për argjentinasin mungon ende konfirmimi zyrtar i mungesës së tij, por është thuajse e sigurt që do të mungojë dhe rikthimi i tij është parashikuar për sfidën e kampionatit ndaj Parmës.

Situata e De Vrij është më e paqartë: nëse arrin të stërvitet normalisht sot, mund të përfshihet në skuadër.

Pritet që Calhanoglu të luajë pa pushim, ndërsa Barella, i pezulluar në kampionat, do të startojë nga minuta e parë. Mes Frattesi-t dhe Mkhitaryan është një balotazh, me armenin që ka një avantazh të vogël.

Në mbrojtje rikthehet Bastoni, ndërsa në portë pritet të luajë Martinez, i cili është portieri i zakonshëm për Kupën.