Nesër vazhdimi i seancës konstituive, a do të lejojë kryesuesi i VV-së votim?

Kuvendi i Kosovës nesër do të mblidhet sërish për të vazhduar seancën konstituive që nisi për herë të parë më 15 prill.

Seanca do të nisë nga ora 10:00.

Deri tash është arritur votimi i raportit për verifikimin e mandateve dhe kuorumit dhe janë betuar deputetët.

Pika ku ka ngecur konstituimi i kuvendit është votimi i kryeparlamentares. VV ka propozuar Albulena Haxhiun për këtë post, mirëpo nuk ka gjetur përkrahje nga partitë tjera.

Dje u mbajt një seancë por Glauk Konjufca propozoi që të mos shkohet fare në votim duke thënë se ka pasur deklarime që s’do të votohet Haxhiu nga opozita. Ky propozim u përkrah nga kryesuesi i seancës, Avni Dehari.

Ky veprim i Deharit u cilësua si shkelje e rregullores së Kuvendit, mirëpo pritet të shihet nesër nëse do të vihet ose jo në votim propozimi për Albulena Haxhiun kryeparlamentare.