Amorim mbron sulmuesit

Një tjetër frenim pas entuziazmit të rikthimit mbresëlënës në Ligën e Europës kundër Lionit. Mançester Junajtid ra të dielën në shtëpi ndaj Uolvesit (0-1) dhe atmosfera e dramës sportive ka kapërcyer çdo kufi.

Protesta tifozësh kudo, sidomos në rrjetet sociale, kanë detyruar trajnerin Ruben Amorim të marrë një pozicion.

“U them tifozëve të vërtetën, pasi skuadrës sonë po i mungojnë shumë gjëra sivjet.

Kemi shumë për të bërë dhe duhet të fokusohemi në përmirësimin tonë hap pas hapi. E dimë që deri në fund të kampionatit do të jetë kështu dhe pastaj do të duhet të bëjmë diçka, sepse të gjithë duam të mirën e Junajtidit”, deklaroi tekniku portugez.

Në fakt, nën akuzë nuk ka përfunduar vetëm puna e tij, por edhe paaftësia e disa futbollistëve me Rasmus Hojlund në majë të listës së të akuzuarve.

“Nëse nuk shënojmë, nuk ka rëndësi, sepse në fund na duhet rezultati. E vetmja mënyrë që di për t’i zgjidhur problemet, është të punoj dhe të analizoj videot.

Pres gola nga të gjithë sulmuesit, por veçanërisht Hojlund ka nevojë të shënojë një gol. Por, nëse i shikojmë ndeshjet, ne kemi disa lojtarë që humbasin mundësi të mëdha”, përfundoi Amorim.