Rusia vazhdon sulmet ndaj Ukrainës, godet qytetin Sloviansk

Dy persona u plagosën në një sulm të kryer nga Rusia sot në qytetin ukrainas Sloviansk, thanë autoritetet lokale.

Zjarri që ka rënë pas sulmit është shuar nga zjarrfikësit, raporton AA.

Raketa, e cila synonte një zonë banimi, dëmtoi edhe ndërtesat përreth, dhe ekipet mjekësore që mbërritën në vendngjarje pas sulmit i dërguan të plagosurit në spital.

Sulmi i fundit vjen pasi një dron rus goditi një autobus që transportonte punëtorë në qytetin Marhanets herët këtë mëngjes, duke vrarë të paktën nëntë persona.

Shtrirja e plotë e sulmit, i cili mbajti zgjuar Kievin dhe gjysmën lindore të Ukrainës për disa orë gjatë natës, nuk dihej menjëherë.

"Rusët sulmuan një autobus me punonjës të kompanisë që shkonin për të punuar në Marhanets," tha Mikola Lukashuk, kryetar i këshillit rajonal të Dnipropetrovsk.

Serhiy Lisak, guvernator i rajonit Dnipropetrovsk, i cili përfshin Marhanets, në Ukrainën qendrore dhe jugore, tha se nëntë persona u vranë dhe të paktën 30 u plagosën.

Në Kharkiv, Poltava, Odesa, rajoni i Kievit dhe rajoni i Dnipropetrovsk, një natë tjetër kaloi nën sulmet me dronë rusë që synonin civilët dhe infrastrukturën kritike.

Shërbimi ukrainas i urgjencës njoftoi se ka pasur edhe një sulm në lagjen Sinelnikivsky në rajonin Dnipropetrovsk, në të cilin dy persona u plagosën dhe një zjarr shpërtheu në një ndërmarrje bujqësore.

Rusia kreu gjithashtu një sulm "masiv" me dronë në rajonin qendror të Ukrainës, Poltava, duke plagosur të paktën gjashtë persona, thanë shërbimet e urgjencës.

Dy persona u plagosën në një sulm me dron në infrastrukturën civile në periferi të qytetit Odessa, i cili gjithashtu shkaktoi disa zjarre, tha Oleh Kiper, guvernatori i rajonit jugor të Ukrainës, Odessa.

Zjarret e mëdha shpërthyen gjithashtu si rezultat i një sulmi me dron rus në qytetin e dytë më të madh të Ukrainës, Kharkiv, tha kryebashkiaku Ihor Terekhov në Telegram.

Njësitë e mbrojtjes ajrore u angazhuan gjithashtu në zmbrapsjen e sulmeve në rajonin e Kievit, por nuk pati raportime për dëme të mundshme.