Amorimi me gjest të madh

Ruben Amorim ka paguar për 30 anëtarë të stafit të tij mbështetës te Manchester United që të marrin familjet e tyre në finalen e Europa League javën e ardhshme në Bilbao, Spanjë, pasi klubi i kishte informuar se trajnerët, fizioterapistët dhe pjesa tjetër e stafit do të duhej të paguanin vetë për biletat, raporton “ESPN”.

United do të përballet me Tottenham Hotspur në Bilbao më 21 maj, me fitoren që jo vetëm sjell trofeun e Europa League, por edhe një vend në Ligën e Kampionëve për sezonin e ardhshëm.

Megjithatë, drejtuesit e United po vazhdojnë me një sërë masash për të ulur shpenzimet, përfshirë shkurtimin e deri në 200 vendeve të punës në Old Trafford gjatë verës, dhe kanë vënë në dispozicion vetëm nga dy bileta për secilin punonjës për ta blerë, në vend që të financojnë një udhëtim të plotë falas për finalen.

Në kontrast, finalistët e Ligës së Kampionëve, Paris Saint-Germain, konfirmuan javën e kaluar se do të paguajnë për 600 punonjës që të ndjekin ndeshjen ndaj Inter Milanit më 31 maj në Mynih.

United ka marrë këtë vendim për të siguruar që sa më shumë tifozë të mund të blejnë bileta nga kuota e tyre prej 15,000 vendesh për ndeshjen në stadiumin Estadio San Mamés. Lojtarët kanë marrë vetëm nga dy bileta secili, ndërsa shpenzimet e udhëtimit për familjarët dhe miqtë nuk do të mbulohen nga klubi.

Por, sipas burimeve, Amorim – i cili solli disa anëtarë të stafit të tij nga Sporting CP kur mori drejtimin e United në nëntor – ka vendosur të paguajë vetë për stafin e tij mbështetës, përfshirë edhe ata me paga të ulëta, si një formë vlerësimi dhe shpërblimi për kontributin dhe përkushtimin e tyre gjatë një periudhe të vështirë gjashtëmujore në klub.

Po ashtu thuhet se, kur iu bë e qartë se klubi nuk do të paguante për biletat e stafit të tij, Amorim i ka thënë drejtuesve të United se ai vetë do të mbulojë shpenzimet për të siguruar që secili anëtar të mund të marrë me vete deri në dy familjarë apo miq.