Atletico planifikon verë të ‘nxehtë’, gati 100 milionë euro për blerje

Pas një sezoni zhgënjyes në të gjitha frontet, ku është eliminuar nga Liga e Kampionëve dhe ka dalë nga gara si për La Ligën ashtu edhe për Kupën e Mbretit, Atletico Madrid po përgatitet për një revolucion në skuadër me synimin për të forcuar skuadrën për sezonin e ardhshëm.

Sipas gazetës “Marca”, drejtuesit e klubit madrilen kanë vënë në shënjestër dy emra të mëdhenj, mesfushorin e talentuar të Villarrealit, Alex Baena (23 vjeç), dhe qendërmbrojtësin e Tottenham Hotspur, Cristian Romero (27 vjeç).

Atletico e sheh Baena-n si një talent të madh që do të përmirësonte ndjeshëm cilësinë në mesfushë. Për të ulur koston e transferimit të tij, klubi madrilen po konsideron përfshirjen e lojtarëve si Rodrigo Riquelme dhe Samu Lino në marrëveshje, të cilët pëlqehen nga Villarreal.

Në prapavijë, “Colchoneros” janë të gatshëm të investojnë për të siguruar shërbimet e Cristian Romero, një prej mbrojtësve më të vlerësuar aktualisht në Evropë. Argjentinasi shihet si lideri i ri i mbrojtjes madrilene, megjithëse Atletico do të përballet me konkurrencë të fortë për firmën e tij.

Për të realizuar këto dy transferime të mëdha, Atletico Madrid pritet të bëjë një investim që nuk do të jetë më pak se 100 milionë euro, duke e bërë këtë një prej operacioneve më ambicioze të klubit në vitet e fundit.

Me këtë strategji, madrilenët synojnë të rikthehen fuqishëm në elitën e futbollit evropian.