Koreani dorëzon kallëzim penal

Kapiteni i Tottenhamit dhe përfaqësuesi i Koresë së Jugut, Son Heung-min, ka dorëzuar një kallëzim penal pranë policisë koreano-jugore, pasi është bërë viktimë e një përpjekjeje për shantazh, pas raportimeve se një grua e kishte kërcënuar me një pretendim të rremë për shtatzëni.

Sipas agjencisë së lajmeve Yonhap, Policia e Gangnamit në Seul ka ndaluar një grua rreth të 20-ave dhe një burrë në të 40-at, të dyshuar për shantazh dhe përpjekje për shantazh.

Gruaja dyshohet se iu afrua Sonit vitin e kaluar, duke pretenduar se ishte shtatzënë me fëmijën e tij dhe më pas kishte kërkuar para për të heshtur.

Burri në fjalë, sipas raportimeve, e kishte ndjekur më tej çështjen në mars, duke tentuar të përfitojë para nga lojtari.

Agjencia e Sonit deklaroi se kapiteni i Koresë së Jugut është viktimë e qartë në këtë rast.

“Son & Football Limited ka dorëzuar një kallëzim penal për shantazh ndaj personave që e kanë kërcënuar lojtarin me pretendime se do të përhapnin informacione të rreme,” thuhet në deklaratë.

“Policia po heton rastin, dhe ne do të ofrojmë informacione shtesë sapo të përfundojë hetimi.”

“Ne do të ndërmarrim masa të forta ligjore ndaj atyre që janë përfshirë në këtë shantazh dhe kërcënim, të bazuar në pretendime qartësisht të pavërteta,” shton agjencia.