Sllovenia zgjeron kontrollet kufitare me Kroacinë

Sllovenia do të zgjerojë kontrollet në kufirin e brendshëm të Shengenit me Kroacinë dhe Hungarinë.

Lajmi u bë i ditur sot nga ministri i Brendshëm slloven Boshtjan Poklukar duke përmendur përkeqësimin e situatës së sigurisë në Lindjen e Mesme, luftën midis Rusisë dhe Ukrainës, situatën e ndërlikuar në Ballkanin Perëndimor dhe nivelin e lartë të kërcënimit nga terrorizmi si arsye për zgjatjen, raporton N1 Sllovenia.

"Jo vetëm në Ukrainë dhe Lindjen e Mesme, por edhe në Ballkanin Perëndimor. Disa muaj më parë, ndodhi një sulm terrorist në Villach, jo shumë larg nga Sllovenia. Sapo të mos ketë më arsye për këtë masë, do ta heqim atë”, siguroi ai.

Poklukar garanton se kontrollet nuk do të jenë problem për ata që udhëtojnë në Kroaci.

"Vëzhgimi gjatë pushimeve nuk do të ndikojë në vetë transitin dhe pasagjerët që kthehen nga pushimet në Kroaci në Slloveni dhe më tej në vendet e BE. Do të sigurojmë qarkullim të qetë dhe që të mos ketë bllokime të mëdha”, tha ai, duke sqaruar se trafiku do të jetë i njëjtë si në vitet e kaluara.

Poklukar theksoi se këtë vit ka pasur një rënie të ndjeshme të migrimit ilegal përmes rrugës së Ballkanit Perëndimor.

"Këtë vit, policia sllovene ka arrestuar pak më shumë se 5,000 të huaj, ndërsa vitin e kaluar ata arrestuan pothuajse 15,000 gjatë së njëjtës periudhë. Ky është një reduktim i konsiderueshëm i migrimit të paligjshëm," thotë ai.

Fqinji verior i Sllovenisë, Austria, gjithashtu zgjeroi kontrollet kufitare me Slloveninë dhe Hungarinë. Siç njoftoi Ministria e Brendshme e Austrisë, këto janë masa urgjente për të penguar kontrabandistët.

Më 21 tetor 2023, Sllovenia vendosi kontrolle të përkohshme në kufirin e brendshëm të Shengenit me Kroacinë dhe Hungarinë.