Bisedime midis Turqisë dhe Rusisë, ministri Fidan udhëton drejt Moskës! Çfarë pritet të diskutohet

Ministri i Jashtëm turk, Hakan Fidan do të udhëtojë për në Rusi sot, më 26 maj, për një vizitë dy-ditore me ftesë të homologut të tij rus, Sergey Lavrov, thanë burime diplomatike për mediat.

Gjatë vizitës, Fidan do të pritet nga Presidenti rus Vladimir Putin dhe do të zhvillojë një takim me Lavrovin.

Ai gjithashtu pritet të zhvillojë bisedime dypalëshe me zyrtarë të tjerë të lartë rusë, përfshirë Ministrin e Mbrojtjes Andrey Belousov dhe ndihmësin presidencial Vladimir Medinsky, i cili udhëhoqi një delegacion në bisedimet për Ukrainën të mbajtura në Stamboll më 16 maj.

Gjatë takimeve në Moskë pritet të diskutohet në detaje çështje që lidhen me marrëdhëniet dypalëshe midis Turqisë dhe Rusisë.

Dy aktorë kryesorë rajonalë do të shqyrtojnë statusin aktual të bashkëpunimit në fusha kyçe si tregtia, energjia dhe turizmi, dhe do të vlerësojnë hapat e mundshëm në të ardhmen.

Fidan pritet të përsërisë angazhimin e Turqisë për të arritur paqe të qëndrueshme në luftën e Ukrainës dhe të shprehë kënaqësinë me zhvillimet e fundit që tregojnë përparim në këtë drejtim.

Pritet gjithashtu të riafirmohet gatishmëria e Turqisë për të vazhduar të luajë një rol lehtësues në negociatat midis palëve, siç bëri në vitin 2022 dhe gjithashtu më 16 maj.

Palët do të shkëmbejnë gjithashtu pikëpamje mbi çështjet rajonale dhe ndërkombëtare, duke përfshirë Sirinë, Gazën dhe Kaukazin Jugor.