Holanda drejt zgjedhjeve të parakohshme parlamentare pas rënies së qeverisë

Kryeministri holandez në largim, Dick Schoff, ka konfirmuar se zgjedhjet e parakohshme parlamentare do të mbahen në Holandë pas rënies së qeverisë.

Schoff theksoi se kishte mbështetje të gjerë në parlament për mbajtjen e zgjedhjeve të parakohshme dhe shtoi se qeveria e tij teknike do të caktojë së shpejti një datë.

Zgjedhjet nuk ka gjasa të mbahen para tetorit. Zakonisht, për shkak të peizazhit të fragmentuar politik të Holandës, formimi i një qeverie të re zgjat shumë muaj.

Lideri i të djathtës ekstreme holandeze, Geert Wilders, dje rrëzoi koalicionin qeverisës duke tërhequr partinë e tij PVV për shkak të mosmarrëveshjeve mbi politikën e imigracionit.

Lideri i të djathtës ekstreme vlerësoi se qeveria e koalicionit nën kryeministrin Dick Schoff po vononte shumë për të zbatuar politikën më të rreptë të imigracionit ndonjëherë në Holandë, të cilën PVV e kishte promovuar pas fitores së saj në zgjedhjet parlamentare të vitit 2023.

Ministrat që erdhën nga PVV do të largohen nga qeveria, e cila do të vazhdojë punën e saj si një qeveri e përkohshme.

Dje, Schoff njoftoi se do të jepte dorëheqjen dhe e përshkroi vendimin e Wilders si të papërgjegjshëm, duke theksuar se ai do të mbetej kryeministër i përkohshëm derisa të formohej një qeveri e re.