Vritet një person në Bruksel

Një person ka mbetur i vrarë nga të shtënat sot në distriktin Anderlecht të Brukselit, raporton Politico, duke cituar mediat lokale.

Viktima, një burrë 49-vjeçar, u qëllua në gjoks pranë qendrës tregtare Westland rreth orës 9 të mëngjesit, konfirmoi zyra e prokurorit për Brussels Times.

Sipas të përditshmes belge Le Soir, çështja i është referuar një gjyqtari hetues nën kualifikimin e vrasjes dhe policia po kryen hetimet në vendngjarje.

Për momentin nuk ka të dyshuar, ndërsa rrethanat e të shtënave nuk dihen ende. Po vijojnë hetimet për ngjarjen e sotme. Policia nuk ka dhënë asnjë informacion shtesë, raporton kp.

Vitin e kaluar, pati 92 të shtëna në qytet, duke vrarë nëntë persona. Sipas shifrave zyrtare, që nga shkurti 2025, tri të katërtat e rasteve të vitit 2024 nuk kishin asnjë arrestim.