Ishte vendosur që në epokën sovjetike, Kirgistani heq statujën më të madhe të Leninit në Azinë Qendrore!

Autoritetet lokale në qytetin Oş të Kirgistanit kanë hequr një nga monumentet më ikonike të epokës sovjetike, një statujë gjigante prej rreth 25 metrash e Vladimir Leninit, që konsiderohej si më e larta në të gjithë Azinë Qendrore.

Statuja ishte vendosur në qytet që prej vitit 1975, kur Kirgistani ishte ende pjesë e Bashkimit Sovjetik. Vendimi për heqjen e saj u mor nga këshilli bashkiak i qytetit dhe u realizua në mënyrë të heshtur gjatë natës. Autoritetet vendore e cilësuan lëvizjen si një “praktikë të zakonshme” për përmirësimin e estetikës dhe arkitekturës urbane, duke shmangur çdo koment politik mbi simbolikën e saj.

Në vend të statujës do të vendoset një shtyllë flamuri, një veprim që ndjek precedentët e mëparshëm në kryeqytetin Bishkek, ku një tjetër monument i Leninit u zëvendësua në mënyrë të ngjashme.

Pavarësisht përpjekjeve për të çrrënjosur simbolet sovjetike nga hapësirat publike, figura e Leninit vijon të mbetet e pranishme në disa pjesë të Kirgistanit. Përveç monumenteve të tjera të tij që qëndrojnë ende në qytete të ndryshme, emri i Leninit mban edhe një nga pikat më të larta malore të vendit – maja “Lenin Peak”.

Kjo lëvizje vjen në një kontekst më të gjerë të vendeve ish-sovjetike që kërkojnë të forcojnë identitetin e tyre kombëtar dhe të zëvendësojnë trashëgiminë sovjetike me figura dhe simbole vendase.