Zbulohet klubi ku Osimheni dëshiron ta vazhdojë karrierën

Victor Osimhen po e sheh të ardhmen e tij larg Napolit, me një dëshirë të qartë për të provuar veten në Ligën Premier.

Sipas Gazzetta dello Sport, sulmuesi nigerian “ëndërron” një transferim te Manchester United gjatë kësaj vere.

Nga ana tjetër, edhe vetë klubi anglez po shqyrton seriozisht mundësinë për ta afruar Osimhen në “Old Trafford”.

Trajneri Ruben Amorim kërkon përforcime në vijën e parë të sulmit dhe 25-vjeçari është një nga emrat më të lakuar në listën e tij.

Megjithatë, një pengesë e madhe qëndron përpara këtij operacioni. Presidenti i Napolit, Aurelio De Laurentiis, ka qenë i prerë: Osimheni mund të largohet vetëm nëse përmbushet klauzola e lirimit prej 75 milionë eurosh.

Pavarësisht kësaj, Manchester United po vlerëson alternativa për të ulur koston e marrëveshjes. Një nga idetë është përfshirja e një lojtari në shkëmbim për të bindur Napolin dhe emri është i Joshua Zirkzee.

Negociatat pritet të vazhdojnë në javët në vijim, me United që do të tentojë të arrijë një marrëveshje të leverdishme pa përmbushur klauzolën e plotë të lirimit.