Rrezikohet të mbytej, e moshuara nga Kosova shpëtohet nga vrojtuesit në Shëngjin

Një pushuese e moshuar nga Kosova është shpëtuar sot nga vrojtuesit e detit në Shëngjin, pasi është konstatuar në rrezik mbytjeje gjatë kohës që po lahej në det.

Ngjarja ka ndodhur pranë një zone me prani të lartë pushuesish, afër bizneseve të Ervis Pjetrushit dhe Armando Markut. Vrojtuesit e detit kanë reaguar menjëherë dhe kanë arritur ta nxjerrin të moshuarën në breg, duke i dhënë ndihmën e parë.

Pas ndërhyrjes së parë, ajo është dërguar në spitalin e Lezhës për trajtim të mëtejshëm mjekësor dhe ndodhet jashtë rrezikut për jetën.

Ky është një tjetër rast që dëshmon rëndësinë jetike të pranisë dhe gatishmërisë së vrojtuesve të detit gjatë sezonit turistik, për sigurinë e pushuesve në zonën bregdetare të Shëngjinit.