Real humb garën për lojtarin

Real Madridi po shqyrton një transferim të ardhshëm për yllin e Manchester City, Rodri, pasi duket se ka humbur garën për Martin Zubimendi.

Sipas AS, ylli i Real Sociedad është në prag të transferimit tek Arsenal-i.

Pavarësisht përpjekjeve të fundit nga Los Blancos, “Topçinjtë” janë të qetë dhe të sigurt, pasi kanë rënë dakord të paguajnë klauzolën e tij prej 60 milionë eurosh  dhe i kanë ofruar një pagë dukshëm më të lartë. Me marrëveshjen pothuajse të finalizuar, Los Blancos kanë filluar të eksplorojnë alternativa.

Klubi tani po peshon nëse do të qëndrojë me lojtarët e tyre aktualë, përfshirë Eduardo Camavinga, Aurelien Tchouameni dhe Federico Valverde, apo të shikojë objektiva të mëdhenj për të ardhmen.

Një opsion i spikatur është Rodri, por çdo transferim do të shtyhej deri në vitin 2026, kur ai hyn në vitin e fundit të kontratës së tij me Cityn, duke e bërë një marrëveshje të mundshme më të përballueshme.

Fituesi i “Topit të Artë” të vitit 2024 është bërë një nga lojtarët më të mirë në futbollin botëror. Ai luajti një rol kyç në sezonin 2022-23, i cili i dha City-t tripletën, duke shënuar golin e vetëm në finalen e Champions League kundër Inter-it.

Pavarësisht se nuk është një lojtar që bie në sy, qëndrueshmëria dhe inteligjenca e tij taktike kanë bërë që të krahasohen me mesfushorë legjendarë si Sergio Busquets dhe Xabi Alonso.

Gjigandët e La Liga-s, Madrid, pritet ta monitorojnë nga afër situatën e Rodrit te City, veçanërisht pas Kupës së Botës për Klube 2025. Nëse spanjolli nuk e rinovon kontratën e tij deri në vitin 2026, Madridi mund të përpiqet të sigurojë një marrëveshje me çmim të ulur.