Milani i propozon Barcelonës shkëmbimin Leao-Araujo

Milani ka befasuar Barcelonën me një propozim që mund të trazojë merkaton e verës: një shkëmbim i drejtpërdrejtë mes Rafael Leao dhe Ronald Araujo.

Sulmuesi portugez, i cili iu ofrua klubit katalanas edhe në fund të merkatos së verës së kaluar, është rikthyer sërish në qendër të vëmendjes, i shtyrë nga dëshira e qartë e Massimiliano Allegrit, trajnerit të ri të kuqezinjve.

Sipas asaj që raporton “Mundo Deportivo”, Allegri e sheh Araujon si shtyllën ideale të mbrojtjes për projektin e tij të ri te Milani, dhe klubi italian është i gatshëm të përfshijë Leaon në marrëveshje për të bindur Barcelonën.

Megjithëse qendërmbrojtësi uruguaian ka rinovuar së fundmi kontratën deri në vitin 2030, ai ka përfshirë një klauzolë të veçantë që i lejon largimin nga klubi midis datave 1 dhe 15 korrik për një shumë më të ulët sesa klauzola zyrtare e largimit: 65 milionë euro.

Në zyrat e “Camp Nou”, kjo mundësi po analizohet me kujdes.

Drejtuesit sportivë janë të qartë se përforcimi i krahut të majtë të sulmit është një përparësi, me Luis Diaz si objektivin kryesor deri tani.

Megjithatë, refuzimi i Liverpoolit për të negociuar mund të detyrojë klubin të shqyrtojë opsione të tjera si Nico Williams, Marcus Rashford dhe tashmë edhe Leao.

Realiteti ekonomik i Barçës, i kufizuar nga rregullat e “fair play”-t financiar, kërkon që të krijohen të ardhura ose të ulen shpenzimet e pagave për të bërë ndonjë përforcim domethënës.

Në këtë kontekst, një shkëmbim si ai që propozon Milani mund të jetë një mënyrë më e realizueshme për të forcuar repartin ofensiv pa bërë një investim të madh të drejtpërdrejtë.

Leao vlerësohet shumë lart, por Araujo është një nga figurat kyçe të projektit aktual.

Në ditët në vijim, klubi katalanas do të duhet të vendosë nëse është i gatshëm të sakrifikojë një nga liderët e tij për të sjellë një talent ofensiv të nivelit të lartë.