Interi e nis me barazim Botërorin e klubeve

Ndeshja e Kupës së Botës për Klube ndërmjet Monterrey dhe Inter përfundoi me rezultat të barabartë 1-1, një rezultat që për nga rrjedha e lojës favorizon më shumë skuadrën meksikane sesa atë italiane, transmeton KosovaPress.

Goli i parë i takimit erdhi në minutën e 25-të, kur mbrojtësi me përvojë Sergio Ramos, në mënyrë të befasishme, shënoi me kokë pas një goditjeje nga këndi, duke mposhtur portierin Yann Sommer. Ky gol zbuloi edhe një herë dobësitë e Interit në mbrojtje gjatë situatave standarde – një aspekt problematik që ka ndjekur zikaltrit edhe në sezonin e kaluar.

Reagimi i Interit erdhi me Lautaro Martinez, i cili, pas një aksioni të ndërtuar mirë, arriti të barazojë rezultatin, duke treguar vendosmëri dhe formë të mirë fizike, ashtu si edhe pjesa më e madhe e skuadrës, vetëm tetëmbëdhjetë ditë pas zhgënjimit të thellë në finalen e Ligës së Kampionëve në Mynih.

Debutimi i trajnerit Cristian Chivu në një garë madhore nuk ishte ideal, por ai ka disa sinjale pozitive për të ndërtuar më tej. Plani i lojës dhe paraqitja fizike e skuadrës lanë vend për optimizëm.

Me këtë rezultat, Interi merr pikën e parë në grupin e tij dhe përkohësisht i lë vendin e parë River Plate, që do të përballet në vijim me Monterreyn. Ndeshjet e radhës do të jenë vendimtare për fatin e grupit dhe për ambiciet e zikaltrve në këtë turne prestigjioz.