Skandal në Turqi

Stuhia ka përfshirë futbollin turk. Presidenti dhe i gjithë këshilli drejtues i Komisionit Disiplinor të futbollit profesionist janë larguar në masë, të përfshirë në një skandal që lidhet me shpërndarjen e mesazheve private në WhatsApp.

Mesazhet, të zbuluara së fundmi, tregojnë sjellje shumë të papërshtatshme nga ana e anëtarëve të komisionit në fjalë, të cilët në disa pika shfaqin armiqësi ndaj Fenerbahçe dhe trajnerit portugez José Mourinho. Gjatë sezonit kishte shpërthyer një skandal i lidhur me “Special One”.

Në mesazhe, anëtarët e komitetit talleshin me drejtues të klubeve të ndryshme, shfaqnin preferenca për Galatasaray dhe sulmonin ashpër Mourinhon me fraza si “do t’ia bëjmë me dije sezonin e ardhshëm” dhe “është toleruar shumë”. Kjo sjellje e papranueshme çoi në dorëheqjen e presidentit dhe të gjithë këshillit drejtues të Komisionit Disiplinor.

Personi që vendosi pezullimin e José Mourinhos me 4 ndeshje (dy prej të cilave u hoqën më pas nga federata turke pas apelimit të paraqitur prej Fenerbahçe), ishte kapur në një foto, tashmë “virale”, duke mbajtur veshur fanellën e Galatasaray.

Bëhet fjalë për avokatin Celal Nuri Demirtürk, president i Komisionit Disiplinor të federatës. Një profesionist që mediat turke e përshkruajnë si të aftë dhe serioz, por është e qartë se me stuhinë që u krijua pas derbit të Stambollit, akuzat e çmendura për racizëm ndaj Mourinhos, pezullimin dhe padinë që vetë Mou ngriti për dëme morale, një foto e tillë shkaktoi bujë.

Dhe la të hapura shumë pikëpyetje për vazhdimin e sezonit, sepse lufta për titull ishte ende e gjallë, me Fenerbahçe 6 pikë pas Galatasarayt në atë moment.