Si e sheh një gjyqtari një ndeshje futbolli: Shikoni revolucionin, golin dhe kartonin e kuq nga perspektiva e tij

Manchester City e nisi me fitore edicionin e parë të Kupës së Botës për Klube në formatin e ri, pasi ish kampionët e Evropës triumfuan ndaj skuadrës marokene Wydad Casablanca me rezultat 2-0, në ndeshjen e raundit të parë të Grupit G, të zhvilluar në Filadelfia.

Golat për “Citizens” u shënuan nga Phil Foden dhe Jeremy Doku, duke i siguruar tre pikë të para skuadrës së Pep Guardiolës në këtë turne global.

Por përveç fitores në fushë, vëmendje të madhe mori edhe mënyra e transmetimit të ndeshjes nga DAZN, rrjeti global sportiv që ka befasuar opinionin me vendimin për të ofruar falas të gjitha ndeshjet e Kupës së Botës për Klube në faqen zyrtare dhe aplikacionin e tyre – pavarësisht investimit prej 1 miliard dollarësh në të drejtat e transmetimit.

DAZN ka sjellë një risi teknologjike në transmetim: gjyqtarët e ndeshjes mbajnë kamera të vendosura në uniformë, duke ofruar pamje unike nga perspektiva e gjyqtarëve. Këto kënde transmetohen më pas të kombinuara me kamerat ndihmëse në fushë, duke krijuar një përvojë të re për shikuesit.

Falë kësaj teknologjie, tifozët patën mundësinë të shohin nga afër golin e dytë të Man Cityt nga këndvështrimi i gjyqtarit, si dhe momentin e dhënies së kartonit të kuq për Rico Lewis.