Bayerni i vihet pas yllit të Liverpoolit

Kampionët e Premier League nuk po humbasin kohë kur bëhet fjalë për përforcimin e skuadrës për mbrojtjen e titullit në sezonin e ardhshëm.

Liverpool siguroi titullin e tyre të dytë në epokën e Premier League dhe menjëherë veproi në merkato, duke afruar mbrojtësin e djathtë Jeremie Frimpong, i cili pritet t’i japë më shumë fleksibilitet Arne Slotit në krah, pas largimit të diskutueshëm të Trent Alexander-Arnold.

Me njoftimin e afërt të transferimit të mbrojtësit të majtë Milos Kerkez nga Bournemouth, “The Reds” shkuan më tej në përforcimin e mesfushës, duke realizuar një marrëveshje rekord për Florian Wirtz, mesfushorin ofensiv gjerman. Marrëveshja mund të arrijë 116 milionë paund, nëse përmbushen të gjitha bonuset.

Në mënyrë tipike, një talent i ri gjerman që ndihmon në rrëzimin e Bayern Munich nga froni i Bundesligës – siç bëri Wirtz nën drejtimin e Xabi Alonsos te Bayer Leverkusen në sezonin 2023-24 – do të kalonte thjesht te vetë Bayerni.

Dhe në fakt, ishte raportuar gjerësisht që Bayern Munich kishte interes për yllin e ri, por kalimi i tij në Premier League i detyroi bavarezët të kërkojnë alternativa.

Sipas “Liverpool.com”, kampionët e Gjermanisë tashmë kanë kthyer vëmendjen drejt “Anfield”, në përpjekje për të siguruar një “kompensim” për Wirtz – dhe synimi është Luis Díaz.

Trajneri i Bayernit, Vincent Kompany, pritet të përballet me konkurrencë të fortë nga Barcelona dhe vetë Slot, të cilët gjithashtu duan të mbajnë kolumbianin.

“Bayern Munich thuhet se e ka përfshirë Luis Díaz në listën e opsioneve të tyre,” raporton Matt Addison.

Díaz ka shprehur dëshirën për të qëndruar te Liverpool nëse arrihet një marrëveshje për rinovimin e kontratës, e cila skadon pas dy vitesh – dhe trajneri Slot besohet se është në të njëjtën linjë.

Bayern ka qenë gjithashtu i interesuar për Nico Williams, që tashmë po shkon drejt Barcelonës, dhe për Rodrygon e Real Madridit, por pas dështimit të këtyre pistave, vëmendja e tyre është kthyer nga Merseyside, si dhe drejt Bradley Barcola të PSG-së dhe Jamie Gittens të Borussia Dortmundit.

Me një listë të tillë objektivash, ekipi i rekrutimeve të Bayernit nuk do të ketë shumë kohë për të shijuar ndeshjet e ekipit në Kupën e Botës për Klube.

Skuadra e Kompany e nisi turneun me një fitore 10-0 ndaj Auckland City, dhe më pas kaloi Boca Juniors në një ndeshje më të ngushtë.

Tani, ndeshja e së martës kundër Benficas do të përcaktojë nëse Bayerni do ta përfundojë fazën e grupeve në vendin e parë apo të dytë, ndërkohë që skuadra portugeze duhet të shmangë humbjen, përndryshe do të duhet të shpresojë që Auckland të mos pësojë shumë gola nga Boca.