Konfirmon Pallati Buckingham: Trump do të vizitojë Mbretërinë e Bashkuar në vjeshtë

Presidenti i SHBA-së, Donald Trump, do të bëjë një vizitë të dytë shtetërore të paprecedentë në Mbretërinë e Bashkuar këtë vjeshtë, konfirmoi të mërkurën Pallati Buckingham.

Mbreti Çarls do ta presë presidentin amerikan pasi një ftesë e nënshkruar nga monarku, e quajtur “Manu Regia”, iu dërgua Shtëpisë së Bardhë nga përfaqësues të Ambasadës Britanike në Uashington javën e kaluar.

Trump fillimisht pranoi një ftesë nga mbreti gjatë udhëtimit të kryeministrit Keir Starmer në Shtëpinë e Bardhë në shkurt.

Nuk do të ketë një takim privat midis presidentit dhe mbretit gjatë verës për shkak të axhendave të tyre kontradiktore, pavarësisht se mbreti e propozoi një të tillë në ftesën e tij fillestare.

Një ndihmës i Pallatit të Buckinghamit i tha BBC-së  se “Madhëria e Tij e njeh Presidentin Trump prej shumë vitesh dhe mezi pret ta presë atë dhe Zonjën e Parë këtë vit.”

Duke folur në Dhomën e Komunave të mërkurën, zëvendëskryeministrja Angela Rayner tha se qeveria ishte “vërtet e kënaqur që presidenti i SHBA-së po vjen për një vizitë të dytë shtetërore”.

Trump më parë bëri një vizitë shtetërore gjatë mandatit të tij të parë në vitin 2019 dhe u takua me Mbretëreshën e ndjerë Elizabeth, duke shkaktuar protesta .

Rasti do të shënohet me pompozitet dhe madhështi dhe zakonisht përfshin një darkë banketi. Punimet e vazhdueshme të rinovimit në Pallatin e Buckingham-it nënkuptojnë se të gjitha vizitat shtetërore tani do të zhvillohen në Kështjellën Windsor.

Trump tha në prill se Mbretëria e Bashkuar po “caktonte një datë për shtatorin”, por datat e sakta nuk janë konfirmuar.

Gazeta “The Times” raportoi të martën se Starmer kishte sjellë përpara planet për vizitën shtetërore, duke anashkaluar dëshirat e mbretit për të mbajtur një takim joformal më të hershëm dhe për të mos u nxituar në një vizitë zyrtare për shkak të shqetësimeve rreth dëshirës së deklaruar të Trump për të aneksuar Kanadanë.

Zëdhënësi zyrtar i kryeministrit tha se ishte “e pavërtetë” të sugjerohej se Keir Starmer kishte anashkaluar planet e mbretit për kohën kur do të ndodhte vizita.