Vendoset e ardhmja e Cristiano Ronaldos

Gazetari i njohur Fabrizio Romano ka raportuar një tjetër lajm të bujshëm në merkato. Cristiano Ronaldo është shumë pranë qëndrimit te Al Nassr edhe pas përfundimit të kontratës aktuale, përcjellë kp.

Ylli portugez, i cili ka kontratë deri në fund të muajit qershor, duket se ka gjetur gjuhën e përbashkët me drejtuesit e klubit saudit për të vazhduar bashkëpunimin edhe për një ose dy sezone të tjera. Sipas Romanos, palët janë në bisedime të avancuara dhe po punojnë për finalizimin e detajeve të fundit të marrëveshjes.

Ky zhvillim vjen pas spekulimeve të shumta për të ardhmen e Ronaldos, i cili ka qenë i lidhur me rikthimin në Evropë apo transferime të tjera të mundshme. Megjithatë, burimet pranë lojtarit dhe klubit konfirmojnë se lojtari është i kënaqur në Arabinë Saudite, si në aspektin sportiv, ashtu edhe financiar.

Rinovimi i mundshëm i kontratës pritet të forcojë më tej rolin e Ronaldos si figurë kyçe në projektin ambicioz të Al Nassr dhe të kampionatit saudit në përgjithësi, që po synon të tërheqë gjithnjë e më shumë emra të mëdhenj të futbollit botëror.

Mbetet të shihet se kur do të vijë zyrtarizimi, por të gjitha sinjalet tregojnë se Cristiano Ronaldo nuk ka ndërmend të largohet ende nga Lindja e Mesme.