Al-Hilal fiton trilerin e shtatë golave ndaj Man Cityt dhe avancon në çerekfinale

Manchester City ka pësuar humbje me rezultat 4-3 ndaj Al-Hilal, duke u eliminuar kështu nga Kupa e Botës për Klube. 

Kjo ndeshje ishte një triler i vërtetë dhe një tjetër befasi e këtij Botërori të Klubeve, pas triumfit të Fluminenses ndaj Interit. 

Të parët që kaluan në epërsi ishin Man City, të cilët realizuan për 1-0 në minutën e nëntë me Bernardo Silvan. 

Me të filluar pjesa e dytë, klubi arab reagoi shpejtë, duke arritur të shënojë dy gola për të përmbysur gjithçka. 

Marcos Leonardo (46’) ishte autor i golit të barazimit për 1-1, teksa për epërsinë e Al-Hilal u përkujdes Malcolm (52’) që realizoi për 2-1 pas asistimit nga Joao Cancelo. 

Vetëm tre minuta më vonë, Erling Haaland (55’) ishte në vendin e duhur në kohën e duhur, për të barazuar shifrat në 2-2. 

90 minuta nuk prodhuan fitues dhe ndeshja shkoi në vazhdime, aty ku u shënuan edhe tre gola të tjerë dhe në fund Al-Hilal doli fitues. 

Kalidou Koulibaly (94’) realizoi me kokë për rezultatin 3-2, ndërsa në minutën e 109-të Phil Foden realizoi për 3-3 pas një asistimi të bukur nga Rayan Cherkit. 

Goditjen ‘vdekjeprurëse’ Cityt ia dha Leonardo, i cili në minutën e 112-të realizoi për 4-3 pas një kundërsulmi të shpejtë nga klubi arab. 

Në çerekfinale Al-Hilal tashmë do të përballet me Fluminensen.