Barcelona rikthehet në rregullin “1:1”

Barcelona po punon për të regjistruar portierin Joan Garcia, pasi e aktivizoi klauzolën e lirimit të tij muajin e kaluar. Klubi gjithashtu synon të sigurojë hapësirë brenda kufirit të pagave për të bërë të njëjtën gjë edhe për Nico Williams, yllin e Spanjës.

Nëse arrijnë të kthehen brenda kufirit të lejuar të pagave, Barça do të mund të shpenzojë gjithçka që fiton dhe kursen – e ashtuquajtura rregulla “1:1”.

Në rast të kundërt, mund të shpenzojnë vetëm rreth 60% të të ardhurave.

Për të nënshkruar me Williams, klubi duhet të paguajë menjëherë klauzolën prej 58 milionë eurosh. Thelbësore për këtë është që marrëveshja për qiradhënien e ulëseve VIP në “Camp Nou”, me vlerë 100 milionë euro, të miratohet nga auditori Crowe – diçka që nuk ndodhi në muajin prill.

Sipas Sport, presidenti i La Ligës, Javier Tebas, i ka konfirmuar presidentit të Barcelonës, Joan Laporta, se klubi do të rikthehet brenda kufirit të pagave dhe do të mund të shpenzojë sipas rregullit “1:1”. Ai beson se Barcelona i ka përmirësuar financat dhe ka ndërmarrë hapat e nevojshëm – një vendim që pritet të konfirmohet brenda pak ditësh.

Megjithatë, ky raport bie ndesh me deklaratat e bëra vetëm një ditë më parë nga vetë Tebas, i cili tha për Cadena Cope se “Barça sot nuk mund ta regjistrojë Nico Williams.” Raportime të tjera thonë se katalanasit janë rreth 30 milionë euro larg mundësisë për të regjistruar si Williams, ashtu edhe Garcia.