City po kërkon blerës për Grealish, katër opsione për yllin anglez

Manchester City po punon intensivisht për të gjetur një klub të ri për Jack Grealish gjatë kësaj vere, por deri më tani po has vështirësi për të përmbushur kushtet që i ka vendosur për largimin e tij.

Pavarësisht përpjekjeve të vazhdueshme, ish-kampionët e Ligës Premier nuk kanë marrë ende një ofertë që të përputhet me pritjet financiare për kartonin e sulmuesit anglez.

Grealish iu bashkua Cityt në vitin 2021 për një shumë rekord prej 100 milionë funtesh dhe aktualisht është një nga lojtarët më të paguar të skuadrës, me një rrogë javore prej 300 mijë funtesh.

Përjashtimi i tij nga lista për Kupën e Botës për Klube u interpretua si sinjal i qartë i synimit të klubit për ta larguar atë.

City është i hapur si për huazim, ashtu edhe për shitje të përhershme, por deri më tani, asnjë ofertë nuk ka përmbushur kërkesat e klubit. Ata kishin shpresuar ta zgjidhnin të ardhmen e Grealish përpara nisjes së fazës përgatitore, por kjo po bëhet gjithnjë e më e vështirë.

Lojtari dëshiron të qëndrojë në Evropë dhe të rikthejë formën, me shpresën për t’u grumbulluar në ekipin kombëtar për Kupën e Botës verën e ardhshme. Ai nuk është thirrur ende nga trajneri i ri i Anglisë, Thomas Tuchel, dhe nevojitet kohë e rregullt loje për të rikthyer vëmendjen.

Newcastle United mbetet skuadra favorite për të ardhmen e Grealish, por edhe ish-klubi i tij Aston Villa po synon një rikthim të bujshëm të yllit anglez në Villa Park. Megjithatë, asnjëra nga këto skuadra nuk ka bërë ende ofertë zyrtare.

Ndërkohë, interes kanë treguar edhe klubet italiane si Napoli dhe Milan, që e vëzhgojnë me kujdes situatën.