Evakuime masive për shkak të zjarreve që përshkojnë ishullin grek të Kretës

Qindra njerëz janë evakuuar ndërsa një zjarr i madh vazhdon të digjet jashtë kontrollit në ishullin grek të Kretës.

Zjarri, i cili është përhapur nga erërat e forta, shpërtheu të mërkurën pasdite në një terren të thyer pyjor pranë komunës së Ierapetrës.

Flakët janë përhapur me shpejtësi, duke kërcënuar shtëpitë, akomodimet turistike dhe infrastrukturën kritike, përfshirë një pikë karburanti.

Fronti i zjarrit tani shtrihet në të paktën 6 kilometra, sipas shërbimeve të emergjencës, duke e bërë gjithnjë e më të vështirë kontrollin.

Tymi i dendur ka përfshirë zonën më të gjerë, duke e ulur dukshmërinë në pothuajse zero në disa vende.

Autoritetet kanë urdhëruar gjithashtu evakuimin masiv të hoteleve, dhomave me qira dhe shtëpive në komunën Ferma, ndërsa flakët i afrohen zonës.

Operacioni është duke u zhvilluar me mbështetjen e shërbimit të zjarrfikësve, policisë dhe vullnetarëve vendas.

Deri më tani, afërsisht 1,500 persona janë evakuuar nga vendbanimet dhe zonat turistike përreth dhe janë zhvendosur në Ierapetra.

Rreth 200 të evakuuar po strehohen në arenën sportive të mbyllur të qytetit.

Tymi nga zjarri është shtrirë deri në plazhin Makry Gialos, 10 kilometra  nga Achlia në Lasithi, ku zjarrfikësit po luftonin me flakët.

Rruga kryesore pranë vendbanimit Agia Fotia është mbyllur nga policia, e cila u ka kërkuar banorëve dhe vizitorëve të shmangin të gjitha udhëtimet jo të domosdoshme për shkak të cilësisë së rrezikshme të ajrit, nxehtësisë ekstreme dhe hirit që bie.

Në vendbanimin Agia Fotia, shtëpitë dhe pronat me qira janë shkatërruar, dhe zona po përjeton ndërprerje të energjisë elektrike, sipas raporteve lokale.

Të paktën katër të moshuar janë dërguar në spital me probleme të frymëmarrjes të shkaktuara nga thithja e tymit.

Si masë paraprake, të gjitha spitalet në Kretë janë vënë në gatishmëri nga autoritetet shëndetësore.