Trajneri i Gwangju i bën thirrje klubit të mbajë Jasir Asanin

Nuk duan të humbasin lojtarët më të mirë që kanë.

Jasir Asani padyshim është një nga yjet kryesorë te Gwangju në Korenë e Jugut, dhe trajneri i tij i bën thirrje klubit që të bëjë sakrificë për ta mbajtur.

Në një intervistë për mediat në vendin e tij pas kualifikimit në gjysmëfinale të Kupës koreane, Li Jung-Hio, deklaroi se është e domosdoshme që shqiptari të mos largohet.

Ai argumentoi se Guangju është i bllokuar dhe se nuk mund të marrë përforcime pas ndëshkimit nga FIFA, ndaj edhe nuk mund të rrezikojë duke humbur futbollistët pasi kjo mund ta zbriste nga kategoria.

Li Hjung Hio shtoi se pasi ndoqi lojën e Asanit ndjeu se duhej patjetër që të fliste me klubin.

Tifozët ndërkaq janë duke mbledhur donacione për të ndihmuar skuadrën.

Gwangju u ndëshkua për parregullsi financiare, dhe u mendua se largimi i Asanit ishte i sigurt.

Jokohama nga Japonia këmbënguli për të, dhe u fol për një shumë transferimi prej 1 milionë USD, por kjo nuk ndodhi.

Gjithsesi, për yllin e kombëtares shqiptare interesohen edhe klube të tjerë, siç e ka bërë të qartë vetë lojtari si dhe trajneri i ri.

Këtë sezon, Asani ka qenë në formë shumë të mirë me 9 gola dhe 1 asist në Championsin e Azisë, si dhe me 6 gola e 2 asistë deri tani në Ligën e Koresë së Jugut.