Van Dijk me mesazh prekës pas vdekjes tragjike të Diogo Jotës

Kapiteni i Liverpoolit, Virgil van Dijk, ka reaguar me dhimbje të thellë pas vdekjes tragjike të shokut të tij të skuadrës, Diogo Jota, dhe vëllait të tij, André Silva.

Në një mesazh emocional të publikuar në rrjete sociale, Van Dijk shprehu tronditjen e tij të thellë për humbjen e bashkëlojtarit dhe mikut të ngushtë:

“Nuk mund ta besoj, nuk dua ta besoj. Jam i shkatërruar dhe plot mosbesim. Çfarë njeriu, çfarë lojtari, por më e rëndësishmja, çfarë familjari i jashtëzakonshëm.”

Ai vuri theksin te dhembja e madhe që po kalon familja e Jotës:

“Për familjen tënde të humbasë dy djem, një bashkëshort dhe një baba është e paimagjinueshme. Shumë mizore dhe e padrejtë. Zemra ime po thyhet për gjithë familjen tënde të bukur, për Ruten dhe për fëmijët e tu. Të premtoj se në këto kohë të vështira dhe më tej ne gjithmonë do të jemi pranë familjes tënde.”

Van Dijk tha se ndjehej i nderuar që kishte luajtur krah për krah me Jotën:

“Një kampion përgjithmonë, numri 20 përgjithmonë. Ishte një privilegj të qëndroja pranë teje në fushë dhe të isha miku yt jashtë saj.”

Në fund, ai përmbylli mesazhin me fjalë që prekin zemrën e çdo tifozi:

“Do na mungosh pafund dhe kurrë nuk do të harrojmë. Trashëgimia jote do të jetojë, ne do të kujdesemi për këtë.”

Diogo Jota ndërroi jetë të enjten në një aksident tragjik në Spanjë, bashkë me vëllain e tij André. Reagimet nga bota e futbollit vazhdojnë, duke e kujtuar atë si një futbollist të jashtëzakonshëm dhe një njeri të dashur për të gjithë.