Palmeiras shpreson në një ndeshje të madhe nga Estevao kundër Chelsea

Trajneri i Palmeiras, Abel Ferreira, shpreson që ylli i ri Estevao Willian të dhurojë një paraqitje të jashtëzakonshme në çerekfinalen e Kupës së Botës për Klube ndaj Chelsea, klubit ku do të transferohet pas përfundimit të këtij turneu.

Futbollisti pritet të largohet nga Palmeiras pas përfundimit të garës në SHBA për t’iu bashkuar Chelsea, në një marrëveshje që është arritur më shumë se një vit më parë dhe që kap një shumë të madhe parash.

Ferreira, duke folur për gazetarët, ka thënë se megjithëse nuk ka diskutuar me lojtarin për transferimin, ai e di shumë mirë çfarë pritet nga ai në këtë ndeshje.

"Ai e di çfarë duhet të bëjë nesër dhe shpresoj të japë maksimumin e tij, edhe për ata që do të jenë pronarët e tij të ardhshëm”, është shprehur trajneri. “E shohin si një lojtar me potencial dhe kjo është një mundësi që të tregojë se sa i mirë është. Pres nga ai që të japë maksimumin: të sulmojë, të mbrojë dhe ndoshta të shënojë një gol si përshëndetje për tifozët tanë”.