Rashica rikthehet në Bundesligë

Milot Rashica është shumë pranë rikthimit të madh në Bundesligën gjermane.

Sipas mediave turke, Borussia Monchengladbach ka arritur marrëveshje në parim me Besiktasin për transferimin e anësorit kosovar.

Gladbach ka ofruar 10 milionë euro për kartonin e Rashicës – ofertë që është pranuar nga klubi turk, i cili tashmë e kishte vendosur lojtarin në listën e shitjeve.

Pritet që gjithçka të bëhet zyrtare brenda pak ditësh, pasi palët kanë rënë dakord për kushtet e përgjithshme.

Rashica, që ka kontratë me Besiktasin deri më 2027, nuk bën pjesë në planet e trajnerit Ole Gunnar Solskjaer, dhe largimi i tij ishte i pashmangshëm.

Në sezonin 2024/25, ai regjistroi 41 paraqitje, duke shënuar 5 gola dhe dhënë 12 asistime, duke treguar kontribut të rëndësishëm pavarësisht se nuk ishte pjesë e planeve afatgjata të klubit.

Për Rashicën, ky do të jetë një rikthim i njohur, pasi më parë ka luajtur në Bundesligë me Werder Bremenin.