Një grua gati sa nuk vdiq në aksident në të njëjtin vend ku ndodhi tragjedia e Diogo Jotas

Diogo Jota, sulmuesi i Liverpoolit, dhe vëllai i tij Andre Silva humbën jetën më 3 korrik 2025, në një aksident tragjik me makinë në autostradën A-52 pranë Zamorës, Spanjë.

Makina e tyre Lamborghini doli nga rruga dhe u përfshi nga flakët, duke shkaktuar vdekjen e menjëhershme të të dyve.

Eksperti i sigurisë rrugore, Javier López Delgado, ka ngritur shqetësime serioze për gjendjen e segmentit rrugor ku ndodhi aksidenti.

Ai deklaroi se rruga është plot defekte dhe se edhe pse një shpërthim gome është shkaku i dyshuar, ai nuk do të ishte fatal në kushte më të sigurta infrastrukturore.

“Ka shumë të meta në atë segment – nuk është vetëm çështje shpejtësie”, tha ai për gazetën La Opinión de Zamora.

Aksidenti i Jotës nuk ishte i vetmi në atë pjesë të autostradës. Vetëm tetë ditë më parë, një grua 60-vjeçare pësoi një përplasje të rëndë në të njëjtin vend dhe u shpëtua me vështirësi nga zjarrfikësit. Kjo ka ngritur dyshime të forta se bëhet fjalë për një “pikë të zezë aksidentesh”.

Guardia Civil konfirmoi se po përgatitet raporti përfundimtar, ndërsa ende nuk është bërë e ditur kush po e drejtonte makinën në momentin e aksidentit. Autoritetet theksojnë se parakalimi në një zonë me kthesa të mprehta dhe shpërthimi i gomës janë elementë kyç të incidentit.

Jota dhe vëllai i tij po udhëtonin drejt Santanderit për të marrë tragetin drejt Britanisë, pasi futbollistit i ishte rekomanduar të mos udhëtonte me aeroplan për shkak të një ndërhyrjeje të fundit mjekësore në mushkëri.

Funerali i tyre u zhvillua në qytetin e lindjes, Gondomar, ku morën pjesë qindra njerëz, përfshirë familjarë, shokë skuadre dhe figura të njohura të futbollit.

Mediat britanike raportojnë se bashkëshortja e Jotës, Rute Cardoso, e cila ishte martuar me të vetëm 11 ditë para aksidentit, pritet të trashëgojë deri në 40 milionë euro për të siguruar të ardhmen e saj dhe tre fëmijëve të tyre.