Spikeri legjendar Michael Buffer gati për Kupën e Botës për Klube, sa fiton ai për çdo paraqitje?

Kur Chelsea të zbresë në fushë ndaj Fluminense në gjysmëfinalen e Kupës së Botës për Klube, vëmendja nuk do të përqendrohet vetëm te lojtarët.

Spikeri legjendar Michael Buffer – i njohur për frazën ikonike “Let’s get ready to rumble!” – do të jetë aty për t’i dhënë një atmosferë spektakolare sfidës.

Buffer, tashmë 80 vjeç, është angazhuar për të prezantuar jo vetëm këtë ndeshje, por edhe përballjen gjysmëfinale mes Real Madridit dhe PSG-së, si dhe finalen e madhe të turneut. Me stilin e tij të veçantë dhe zërin karakteristik, ai pritet të sjellë dramë dhe emocion të rrallë në skenën e futbollit botëror.

Sipas Yahoo, Buffer fiton mes 25,000 dhe 100,000 dollarë për çdo paraqitje, falë frazës së tij të regjistruar si markë tregtare që nga viti 1992 – një aset që e ka ndihmuar të ndërtojë një pasuri neto prej rreth 400 milionë dollarësh.

Karriera e tij nisi në mënyrë të pazakontë në fillim të viteve ’80, kur pas një njoftimi të dobët në një ndeshje boksi, djali i tij i sugjeroi të provonte vetë. Një audicion i suksesshëm më pas e çoi në ringun e ESPN, dhe pjesa tjetër është histori.

Tani, Buffer është gati të ngrejë në skenë klubet më të mëdha të futbollit, ashtu si dikur ngriti emrat e legjendave të boksit si Mike Tyson dhe Evander Holyfield.