Man Utd ka një armë sekrete për të rrëmbyer transferimin e Viktor Gyokeres

Manchester United është ende në garë për Viktor Gyokeres, megjithëse Arsenali konsiderohet favorit për të siguruar shërbimet e tij këtë verë. Sulmuesi suedez i Sporting CP ka tërhequr vëmendjen e disa prej klubeve më të mëdha në Evropë, përfshirë edhe Juventusin.

Arsenali thuhet se ka bërë hapa konkretë drejt marrëveshjes, por sipas raportimeve të fundit, Manchester United mbetet një opsion aktiv nëse bisedimet e “Topçinjve” nuk përfundojnë me sukses.

Sipas gazetarit Ben Jacobs, Gyokeres nuk e ka refuzuar kurrë idenë për t’u bashkuar me Manchester United dhe mbetet i hapur për një transferim në “Old Trafford”, edhe në mungesë të Ligës së Kampionëve.

Megjithatë, deri tani nuk ka pasur kontakte zyrtare midis Manchester United dhe Sportingut. Interesimi është shfaqur vetëm nga kampi i lojtarit, që ka sinjalizuar gatishmëri në rast se Arsenali tërhiqet.

Një tjetër element interesant është miqësia e ngushtë e Gyokeres me sulmuesin e Manchester Cityt, Erling Haaland. Sipas mediave britanike, kjo mund të ndikojë në preferencën e tij për të jetuar dhe luajtur në Manchester.

Për momentin, topi mbetet në fushën e Manchester United. Klubi duhet të vendosë nëse do ta konkretizojë interesimin apo do t’ia lërë Arsenalin ta përfundojë marrëveshjen pa konkurrencë.