Franca paralajmëron për aktivitetin rus “jashtëzakonisht shqetësues” nën ujë dhe në hapësirë

Rusia ka të ngjarë të dëshirojë të militarizojë hapësirën, dhe aktivitetet e saj nënujore janë gjithashtu “jashtëzakonisht shqetësuese”, tha një gjeneral i lartë francez në një konferencë të rrallë për shtyp të premten.

Shefi i Shtabit të Mbrojtjes, Thierry Burkhard, e quajti Kremlinin një “kërcënim të përhershëm” dhe tha se nëndetëset ruse “hyjnë rregullisht në Atlantikun e Veriut dhe pastaj ndonjëherë zbresin në Mesdhe” për të “monitoruar zona të rëndësishme [për Francën]”.

Burkhard tha gjithashtu se satelitët e Moskës po përdoren për të spiunuar ose bllokuar pajisjet franceze. Ai gjithashtu vuri në dukje “shenjat e një dëshire për të militarizuar hapësirën” me satelitë të specializuar “që ka të ngjarë të mos jenë të ligjshme sipas ligjeve për mosmilitarizimin e hapësirës”.

Në konferencën e parë për shtyp nga Shefi i Shtabit të Mbrojtjes Franceze që nga viti 2021, Burkhard u përpoq të përshkruajë kërcënimet me të cilat përballet aktualisht Franca përpara fjalimit të Presidentit Emmanuel Macron në lidhje me mbrojtjen të dielën, në të cilin pritet të bëjë njoftime të rëndësishme.

Përveq Rusisë, Burkhard theksoi gjithashtu se si tensionet në pjesë të tjera të botës – përfshirë Lindjen e Mesme – po e përkeqësojnë më tej një situatë tashmë të vështirë për trupat franceze. Ai theksoi se “përdorimi i pakufizuar i forcës” dhe “zakonshmëria ndaj dhunës” janë bërë elementë përcaktues të peizazhit global.

Ndërsa shmangu një thirrje të drejtpërdrejtë për rritjen e shpenzimeve ushtarake, Burkhard tha se gjetja e mënyrës më të mirë për t’iu përgjigjur këtyre sfidave “ka të ngjarë të ketë një kosto”.

Franca synon të rrisë buxhetin e saj ushtarak në 67.4 miliardë euro deri në vitin 2030, nga 50.5 miliardë euro këtë vit./Geopost