“Verat që dikur i njihnim marrin fund”: Evropa përballet me periudha më të gjata nxehtësie, Tirana dhe Athina kryesojnë listën

Nxehtësia ekstreme në Evropë po zgjat shumë më gjatë se muajt tradicionalë të verës, duke rrezikuar seriozisht shëndetin publik dhe infrastrukturën urbane.

Një studim i organizatës “Rezistenca ndaj Klimës për të Gjithë” tregon se disa qytete evropiane tani përjetojnë temperatura mbi 32°C deri në pesë muaj në vit.

Tirana dhe Athina kryesojnë listën me afro 145 ditë vapë ekstreme në vit, ndërsa qytete si Lisbona, Madridi e Parisi përballen gjithashtu me periudha të gjata të të nxehtit.

Shkencëtarët paralajmërojnë se këto stinë të zgjatura të nxehtësisë janë pasojë e drejtpërdrejtë e ndryshimeve klimatike të shkaktuara nga njeriu dhe se rreziku nga sëmundjet që lidhen me nxehtësinë është në rritje, sidomos për të moshuarit dhe të sëmurët kronikë.

Efekti i “ishullit të nxehtësisë urbane” – ku qytetet bëhen më të nxehta se zonat rurale – përkeqëson situatën. Ekspertët kërkojnë masa urgjente si më shumë hapësira të gjelbra, dizajn më të mirë të ndërtesave dhe sisteme të paralajmërimit, pasi politikat aktuale janë të pamjaftueshme për të përballuar krizën në rritje.