Floriana nuk i reziston Ballkanit në Prishtinë! Fiken dritat në fund të pjesës së parë

Ballkani e ka nisur ashtu si i ka hije garat evropiane, duke shënuar fitore me rezultat 4:2 ndaj skuadrës nga Malta, Floriana.

Kjo ishte ndeshja e parë e rrethit të dytë të kualifikueseve të Conference League në futboll. 

Ballkani i Therandës ka treguar lojë të mirë dhe me meritë e ka mposhtur rivalin.

E zeza e kësaj ndeshje është minuta e fundit e pjesës së parë kur fiken dritat në stadiumin  “Fadil Vokrri” në Prishtinë, ky ishte një turp i madh.

Stadiumi në errësirë, si pasojë, gjyqtari u detyrua ta mbyllë para kohe pjesën e parë.

Futbollistët Bleart Tolaj dhe Sunday Adetunji, janë kreatorë të fitores së thellë.

Për Ballkanin shënuan Bleart Tolaj (14 e 32) dhe Sunday Adetunji (27 e 76) dhe për udhëtuesit Grech (8 - nga penalltia) e Jah (25).

Ballkani ka epërsi të mirë për ndeshjen e kthimit dhe me një këmbë gjendet në rrethin e tretë.