Barcelona e do transferimin e Denzel Dumfries, por pengesë janë financat

Barcelona po ndjek nga afër situatën e Denzel Dumfries, sipas raportimeve nga “AS”. Mbrojtësi holandez i Interit shihet si një mundësi potenciale në fund të afatit kalimtar të verës.

Ndërsa drejtori sportiv Deco e sheh atë si një objektiv të zgjuar për shkak të çmimit të tij aktual.

Blaugranët kanë kryer tashmë disa përforcime të rëndësishme, si Joan Garcia, Marcus Rashford dhe Roony Bardghji. Megjithatë, klubi mbetet i hapur për mundësi të reja, ku Dumfries është një emër në krye të listës.

Kontrata e Dumfries përfshin një klauzolë lirimi prej 25 milionë eurosh, e cila është e vlefshme vetëm deri më 31 korrik 2025. Pas kësaj date, Interi mund të kërkojë një tarifë më të lartë, rreth 35-40 milionë euro.

Pavarësisht interesit, Barcelona nuk ka bërë ende ndonjë lëvizje zyrtare, pasi situata financiare e klubit kërkon që të ketë largime përpara se të realizohet ndonjë transferim i ri.

Thuhet se janë zhvilluar bisedime me përfaqësuesit e lojtarit, përfshirë agjentin Jorge Mendes, që ka marrëdhënie të ngushta me presidentin Joan Laporta. Dumfries raportohet se është i hapur për një transferim te Barça.

Dumfries ka qenë prej kohësh në vëzhgimin e Barcelonës, dhe ka bërë përshtypje pozitive në ndeshjet kundër tyre. Mbetet të shihet nëse klubi do të ndërmarrë hapa konkretë para përfundimit të afatit.