Mosquera bëhet afrimi i pestë i verës për “Topçinjtë”

Arsenali ka zyrtarizuar të enjten transferimin e qendërmbrojtësit të talentuar Cristhian Mosquera nga Valencia, për një shumë fillestare prej 15 milionë eurosh.

21-vjeçari spanjoll ka nënshkruar kontratë pesëvjeçare me “Topçinjtë”, me opsion për vazhdim edhe për një vit tjetër.

Vlera e transferimit mund të shkojë deri në 20 milionë euro, varësisht nga paraqitjet e Mosqueras në sezonet në vijim.

Ai do t’i bashkohet menjëherë pjesës tjetër të skuadrës në Singapor, ku Arsenali po zhvillon fazën përgatitore për sezonin e ri.

Mosquera vjen pas 90 paraqitjeve me Valencian në La Liga dhe Kupën e Mbretit, ku ka shënuar një gol.

Cristhian Mosquera është bërë përforcimi i pestë i Arsenalit gjatë këtij afati kalimtar veror, pas transferimeve të mesfushorit spanjoll Martin Zubimendi, sulmuesit anglez Noni Madueke, mesfushorit danez Christian Norgaard dhe portierit spanjoll Kepa Arrizabalaga.