E ardhmja e Donnarumas e paqartë

Paris Saint-Germain nuk dëshiron surpriza dhe tashmë po punon në heshtje për të përforcuar portën për të ardhmen.

Gianluigi Donnarumma ende nuk e ka rinovuar kontratën, e cila skadon në qershor të vitit 2026, dhe kërkesat e larta ekonomike të udhëhequra nga agjenti i tij, Enzo Raiola, kanë shkaktuar pakënaqësi në zyrat e Parc des Princes.

Përballë kësaj situate të pasigurt, drejtuesit sportivë të klubit kanë vendosur të aktivizojnë planin B me një emër të qartë: Lucas Chevalier.

Portieri i ri i Lille, një nga zbulimet e kampionatit francez, është shumë pranë kalimit te PSG. Negociatat janë të avancuara, me vetëm disa detaje që lidhen me bonuset dhe variablat që kanë mbetur për t’u përfunduar.

Olivier Létang, presidenti i skuadrës veriore, e ka vlerësuar Chevalier me 40 milionë euro — një shumë e lartë, por e përballueshme për klubin parisien, veçanërisht nëse largimi i Donnarumma-s bëhet realitet.

Luis Campos, drejtori aktual sportiv i PSG-së, e njeh mirë portierin premtues, pasi kanë punuar së bashku gjatë kohës që Campos ishte te Lille dhe ka besuar në potencialin e tij që kur ai u dallua në kategoritë e moshave. Tani, ai mund të jetë personi që i dorëzon atij çelësat e portës së njërit prej gjigantëve të Europës.

Ndërkohë, Donnarumma po shqyrton të ardhmen e tij. Nga Anglia, si Manchester City ashtu edhe Manchester United po ndjekin nga afër situatën, në pritje të një ndarjeje përfundimtare me PSG-në. Në Paris, tranzicioni tashmë ka nisur të përgatitet.