Papa Leone XIV paralajmëron kundër çdo sulmi ndaj dinjitetit njerëzor në epokën e IA

 Papa Leone XIV paralajmëroi sot për rrezikun e sulmit ndaj dinjitetit njerëzor, në kontekstin e përdorimit në rritje të inteligjencës artificiale (IA) dhe në një epokë të dominuar nga “shkenca dhe teknologjia”.

“Asgjë që vjen nga njeriu dhe zgjuarsia e tij nuk duhet (…) të minojë dinjitetin e të tjerëve”, tha ai gjatë një meshe në Vatikan.

Rreziqet e IA-së janë një temë e përsëritur për papën amerikan.

“Ne jetojmë sot në një kulturë të re, thellësisht të formësuar dhe të ndërtuar nga teknologjia. Varet nga ne dhe nga ju, të sigurohemi që kjo kulturë të mbetet njerëzore”, tha ai.

“Sot, në një kulturë ku dimensioni digjital është i kudondodhur, në një kohë kur lindja e inteligjencës artificiale shënon një gjeografi të re në jetën e individëve dhe të shoqërisë në tërësi, kjo është sfida me të cilën duhet të përballemi, duke reflektuar (…) mbi aftësinë tonë për të dëgjuar dhe folur, për të kuptuar dhe për t’u kuptuar”, vazhdoi ai.

Që në qershor, papa paralajmëroi për pasojat e mundshme të IA-së në zhvillimin intelektual të të rinjve.

“Ne të gjithë jemi (…) të shqetësuar për fatin e fëmijëve dhe të rinjve, dhe për pasojat e mundshme të përdorimit të IA-së në zhvillimin e tyre intelektual dhe neurologjik”, paralajmëroi papa amerikan në një mesazh për pjesëmarrësit e Konferencës së dytë vjetore të Romës mbi IA-në.

“Asnjë brez nuk ka pasur ndonjëherë qasje kaq të shpejtë në sasinë e informacionit që është tani në dispozicion falë IA-së. Por edhe një herë, qasja në të dhëna, sado e gjerë, nuk duhet të ngatërrohet me inteligjencën”, shtoi papa.