Përzgjedhësi i Gjermanisë i vendos kusht Ter Stegenit

Portieri i Barcelonës, Marc-André ter Stegen, është paralajmëruar se, për të garantuar një vend titullari në Kupën e Botës 2026, duhet të jetë portieri i parë edhe në nivel klubi. Kjo i shton presionin 33-vjeçarit, i cili të martën iu nënshtrua një operacioni në shpinë.

Ter Stegen u detyrua t’i nënshtrohet ndërhyrjes kirurgjikale në një moment delikat për të, teksa sheh Barcelonën duke u përpjekur ta largojë nga roli i portierit të parë, pas transferimit të Joan Garcia. Hansi Flick i ka bërë të qartë ter Stegen-it se do të jetë portieri i tretë i ekipit, por gjermani ka premtuar se do të luftojë për vendin e tij, duke pasur ende tre vite kontratë.

Ndërkohë, një nga “kartat” e Barcelonës për ta bindur ter Stegen-in të largohet ishte pikërisht stoli. 33-vjeçari është i dëshpëruar të luajë në Kupën e Botës 2026 me Gjermaninë, pasi për shumë vite ka qëndruar në hije pas Manuel Neuer. Megjithatë, sipas BILD, veterani i Bayern Munich, Manuel Neuer, mund të rikthehet në kombëtare për të luajtur në SHBA nëse kërkohet, ndërsa dyshimet për ter Stegen-in po rriten.

Lëndimi i tij e komplikon rrugën drejt vendit të parë në portë për SHBA, Kanada dhe Meksikë. Portieri i Hoffenheim, Oliver Baumann, gjithashtu është kandidat për të konkurruar për numrin një verën e ardhshme dhe pritet të ketë mundësinë e tij në ndeshjet e mbetura të Gjermanisë në 2025.

Megjithatë, duke folur për median gjermane, përzgjedhësi i Gjermanisë, Julian Nagelsmann, theksoi se, për ta ruajtur vendin si portier titullar, ter Stegen duhet të luajë rregullisht te Barcelona.

“Ai është portieri ynë numër një nëse është i shëndetshëm dhe është portieri i parë në klubin e tij. Në mendjen time, e di që Marc do të kthehet në dhjetor, do të luajë të dyja ndeshjet në mars, edhe në qershor, dhe më pas do të garojë në Kupën e Botës,” tha Nagelsmann për Sky DE, sipas Mundo Deportivo.

“Ritmi i ndeshjeve dhe i stërvitjes është shumë i rëndësishëm, dhe ai e di këtë. Nëse është sërish portieri titullar i klubit të tij, atëherë mund të jetë padyshim portieri ynë titullar, sepse e meriton, por duhet t’i plotësojë kushtet si çdo lojtar tjetër.”

I pyetur se çfarë do të ndodhë nëse ky skenar nuk realizohet, Nagelsmann u përgjigj: “Kemi shumë ide dhe zgjidhje të mira.” Nga këndvështrimi i ter Stegen-it, një lajm pozitiv është që rikthimi i Neuer është përjashtuar, pasi Nagelsmann tha se “kjo mundësi nuk ekziston.”

Der tani, ter Stegen ka qenë i vendosur se nuk do të largohet nga Barcelona, e cila po punon për ta shtyrë drejt një largimi dhe është e gatshme të arrijë një marrëveshje për të ndërprerë kontratën. Megjithatë, ter Stegen mund të jetë më i hapur për një largim përfundimtar apo huazim, qoftë tani ose në janar, nëse e di që nuk do të luajë, duke rrezikuar kështu të ardhmen e tij me kombëtaren.

Gjigantët katalanas besojnë se ta lënë në stol ter Stegen-in mund të ketë më shumë efekt tani, pas qëndrimit të qartë të Nagelsmann-it.